《2020 春天一件「小事」》
由2020 年1月起，大家都只係focus 喺疫情，但2020 年一二月發生左一件小事，好想記低佢。
話說我真係好鐘意食所有炸乜炸物，我可以日日都食炸野，而一直都冇咩事。一二月嘅時候，基本上我冇咩出街，於是日日都會外賣叫炸乜炸物。如事者，我係咁食，然後有一日發現，點解手手腳腳都出疹，仆街喇，我係發濕疹。(印象中，我係喺好細個嘅時候，短暫出過濕疹，好返冇返發過)。濕疹發嘅成因，應該有千萬個。事後檢討，個期疫情爆發，我日日都喺屋企瘋狂睇電視食炸野訓覺再重複睇電視食炸野訓覺好多日。發濕疹可能係因為我零運動零思考零貢獻.....
總之一發不可收拾，手手腳腳都生濕疹，個期我每日嘅routine 就係起身食野R痕搽藥膏訓覺再重複起身食野R痕搽藥膏訓覺。我發覺係冇好過......
於是我就好似讀大學做論文咁，不停上網尋求方法，所有方法我都會試下，例如換床單帶手套飲湯轉沖涼皂睇康復者心得保持好心情再求神拜佛快啲好返。期間，我又睇返啲舊新聞，講有人因為濕疹自殺死，抑鬱，一病就好唔返等等。
可幸嘅係，我一直都好相信吸引力法則..... 只要覺得自己一定會好返，我就會好返
個期我嘅main focus 係說服自己死忍唔好R痕，我完全冇時間諗任何負面野，只係不停同自己講「唔好再R 啦八婆...唔好再R 啦八婆...唔好再R 啦八婆...唔好再R 啦八婆...」
多方親友提供治療方法下，我做左好多改變，例如轉用沖涼皂，日日飲湯，三餐都好似貧僧咁食齋菜，唔再食炸野，再不停跟tom daley 做home workout增強抵抗力，然後再日日睇正能量/吸引力法則/克服心魔等讀物，用意志力convince 自己唔好R 痕。
一個月後，我終於都好返哂，所有疹退哂。如果以前我一定會開香檳再食三日三夜炸乜炸物慶祝。但今次病好我只係開心跳起yeah 幾次就算。
唔係想教授如何戰勝濕疹，到底我用左咁多治療方法，邊樣有效？我完全figure out 唔到。我個case 應該喺濕疹病例係小兒科，但呢個月係令我明白到，原來冇啦啦咩事都冇呆呆滯滯完好冇缺咁安坐家中，對某啲有病嘅人來講，係好奢侈嘅事。
可能有朋友心諗，個世界都focus 喺每日死幾多人，我竟然focus 係一個月濕疹呢件小事上，真係好小題大做。曾經聽子華講過：「悲觀哲學家叔本華話要減輕自己嘅痛苦，首先就要睇下嗰啲比你更加痛苦嘅人。叔本華真係樂觀。當你生暗瘡，你話之其他人生cancer。」現實就係大部份人都鐘意放大自己嘅苦難，好難代入人地嘅困境。可幸係我因為呢件不幸嘅小事，改變左食野運動生活嘅習慣。
#希望我寫完呢篇之後會無忘初衷
#唔好再痴左線食炸野
#吸引力法則
#你信你會好返你就會好返
#希望所有有病嘅人無啦啦好返哂
Search